Promovohen veprat “Për Fe dhe Atdhe” të Sulejman ef. Rexhepit
Në hotelin “Aleksandër Palace” në Shkup, më 22 nëntor, 2019, në Ditën e Alfabetit Shqip, është promovuar kompleti i veprave “Për Fe dhe Atdhe” të autorit Sulejman ef. Rexhepi, Kryetar i Bashkësisë Fetare Islame të Republikës së Maqedonisë së Veriut. Janë këto veprat: “Për Fe e Atdhe” (intervista), “Vetëm Krijuesit tim i përkulem” (intervista), “Përkulem para idealit kombëtar e fetar” (intervista, opinione), “Shtigjeve të dritës” (kumtesa, ligjërata, fjalime), “Frymëzime të shenjta” (fjalime, hytbe, mesazhe, vlerësime) dhe “Heshtja si zhurmë” (kolumna).
Promovimi ka filluar me një pjesë nga Kurani i shenjtë, interpretuar nga hfz. Xhemail Nuhiu, dhe me këndimin e Himnit Kombëtar nga medresantja Rabije Sulejmani. Me fjalë përshëndetëse janë paraqitur: Bujar ef. Spahiu, Kryetar i Komunitet Mysliman të Shqipërisë; dhe Sekretari i Përgjithshëm i Bashkësisë Islame të Republikës së Kosovës, Ahmet ef. Sadriu. Për librat e botuar folën Skënder Hasani, drejtor i Institutit të Trashëgimisë Kulturore dhe Shpirtërore të Shqiptarëve në Shkup, publicisti dhe botuesi nga Shqipëria Fahri Balliu dhe Dekani i Fakultetit të Shkencave Islame në Shkup, prof. dr. Shaban Sulejmani.
Kjo vepër – tha Bujar ef. Spahiu – tregon qartë kontributin e Sulejman Rexhepit në shërbim të fesë dhe të atdheut, duke filluar nga vitet ’90 e gjer më sot. I tërë materiali është përmbledhur kujdesshëm në gjashtë vëllime. Veprat janë një vlerë e shtuar për të gjithë ata që duan të udhëtojnë në kohë dhe të njihen me periudhat e rrugëtimit të BFI-së me në krye Sulejman Rexhepin si Reis’ul-Ulema.
Moderatori, mr. Muzemil ef. Osmani, vuri në dukje një thënie të Rektorit të parë të Universitetit të Tetovës, Fadil Sulejmani, i cili në fillimet e tij ka thënë: “Po të mos ishte Sulejman Rexhepi, nuk do të ishte Universiteti i Tetovës. Dyert e xhamive dhe të mejtepeve kanë qenë të hapura për Universitetin e Tetovës falë Sulejman Rexhepit.”
Filozofia fetare e Sulejman Rexhepit, u tha me këtë rast, është të ruajë dhe të kultivojë Islamin burimor, shqiptar. Ndërsa filozofia e tij politike është: pa fe nuk ka atdhe – dy filozofi të cilat pa dyshim bartin emrin e Sulejman Rexhepit.
Në fund, në emrin e vet dhe të institucionit që udhëheq foli vetë autori, Sulejman ef. Rexhepi, i cili falënderoi për pjesëmarrjen e gjerë dhe tha se binomi për fe dhe atdhe e ka udhëhequr në jetë dhe kësaj do t’i mbetet besnik deri në fund.
Në promovim kanë qenë të pranishëm zv/Kryeministri Bujar Osmani, ministri i Arsimit Arbër Ademi, përfaqësues të jetës shoqërore-politike, kryetarë komunash, mysafirë nga diaspora etj., prej nga Reis’ul-Ulemasë iu dorëzua edhe një mirënjohje për kultivimin e Islamit burimor
Comments are closed.