BFI dhe BIK bashkërisht në shërbim të Zotit, Kombit e Vatanit

Në zyrën e tij, Kryetari i BFI të RMV, Reisul Ulema H. Hfz. Shaqir ef. Fetai në emër të BFI dhe delegacionit i dëshiroi mirëseardhje homologut të tij dhe tërë delegacionit të Bashkësisë Islame të Kosovës, duke e falënderuar Kryemyftiun dhe stafin e tij për vizitën e bërë si dhe takimin e realizuar, ndërsa Kryemyftiu i Kosovës Mr. Naim ef. Tërnava shprehu mirënjohjet e tij për pritjen e bërë si dhe uroi homologun e tij H. Shaqir ef. Fetain dhe gjithë myftinjtë për kryerjen e Umres dhe u dëshiroi që lutjet dhe ibadetet e bëra në vendin e shenjtë, t’iu pranohen tek Allahu Fuqiplotë.

Dy delegacionet në përbërje të zgjeruar biseduam gjerë e gjatë për një bashkëpunim të mirëfilltë për një të ardhme më të mirë.

Pas bisedave konstruktive nga të gjithë pjesëmarrësit u vendos me sa vijon:

– Forcimi i bashkëpunimit të dy bashkësive si motra në sfera të ndryshme të jetës fetaro islame;

– Vazhdimi i realizimit të projekteve në sferën e botimit të veprave të ndryshme, si dhe Revista e përbashkët nga tri Bashkësitë Fetare: e Maqedonisë së Veriut, e Shqipërisë dhe Kosovës;

– Organizimi i paneleve, simpoziumeve, konferencave të ndryshme si dhe gara të Kur’anit Famëlartë dhe organizime të ndryshme;

– Projekte të bashkëpunimit në mes të Shkollave të Mesme islame – Medreseve dhe Fakulteteve të Shkencave- Studimeve Islame;

– Vizita të ndërsjella të imamëve në territoret e Bashkësive Islame me ligjërues të njohur;

– përgatitja e emisioneve dhe projekteve për mjetet e informimit;

– Këmbimi i përvojave të ndërsjella rreth organizimit të Haxhit dhe projektit të kurbanëve;

– Kultivimi edhe më i shëndoshë i doktrinës burimore islame me qëllim të evitimit të synimeve eventuale të radikalizmave të llojeve të ndryshme;

– Përpjekje maksimale të shpjegimit islam konform rrjedhave të kohës me qëllim të një prezantimi të shëndoshë dhe të pastër të Islamit në trevat tona.;

– Vizita të ndërsjella të objekteve fetare tè njohura dhe atraktive në të dy vendet, bashkësive;

– si dhe shumë ide tjera që i nxjerr koha, situata dhe rrjedhat e zhvillimeve fetare dhe kombëtare;

– Të formohen ekipe profesionale për realizimin gradual të synimeve të parapara nga dy Bashkësitë Islame.

– Në të ardhmen të organizohen takime trepalëshe bashkësive islame të Shqipërisë Kosovës dhe Maqedonisë së Veriut.

Në fund, Reisul Ulema H. Hfz. Shaqir ef. Fetai bashkë me Kryemyftiun e Kosovës Mr. Naim ef. Tërnava, përshëndetën takimin dhe vizitën duke konstatuar se bashkëpunimi është vlera më e lartë e besimtarëve të trojeve tona dhe në këtë mënyrë do jemi në krye të detyrës për të bartë emanetin e shpjegimit të Islamit për të qenë në shërbim të Zotit, Kombit, Vatanit dhe qenies njerëzore në përgjithësi.

Delegacioni i Bashkësisë Islame të Kosovës ishte në përbërje të Kryemyftiut Mr. Naim ef. Tërnava, z. Ahmed Sadriu Sekretar i përgjithshëm, z. Vedat Sahiti Kryeimam, z. Sabri Bajgora Drejtor i Institutit për Hulumtime Islame, z. Ramadan Shkodra Drejtor për Kulture dhe Botime, z. Ekrem Simnica Drejtor për Diasporë, z. Rexhep Luma ndihmës Sekretar edhe z. Besim Mehmeti Shef i Kabinetit, ndërsa delegacioni i Bashkësisë Fetare Islame të RMV përbëhej nga Reisul Ulema H. Hfz. Shaqir ef. Fetai, Myftiu i Shkupit Dr. Qenan ef. Ismaili, Myftiu i Tetovës Dr. Qani ef. Nesimi dhe Myftiu i Kumanovës H. Abedin ef. Imeri, Drejtori i Sektorit për Arsim dhe Shkencë Prof. Jusuf ef. Zimeri, Drejtori i Agjencisë për Hallall Standard H. Muhamer ef. Veseli, Kryetari i Shoqatës së Ulemave Rexhep ef. Ziberi, Shefi i Kabinetit Dr. Abdilkerim ef. Iseni, Drejtori i Sektorit për Diaspore Dr. Selver ef. Xhemaili, Drejtori i Sektorit për Marrëdhënie me botën arabe H. Ismet ef. Ademi, Drejtori i Sektorit për Kulturë Musanif ef. Rufati, Udhëheqësi i Sektorit për Marrëdhënie me Turqinë Prof. Nizam Reshit dhe Udhëheqësi i Sektorit për informim publik z. Agron Vojnika.